वडा स्तरीय महिला-पुरुष भलिवल प्रतियोगिता हुँदै

साकेला- नजिकिँदै गरेको दशैं र तिहारको अवसर पारेर साकेला गाउँपालिकामा साविकको वडा स्तरीय खुल्ला महिला तथा पुरुष भलिवल प्रतियोगता सञ्चालन हुने भएको छ । साकेला गाउँपालिका-३ खिदिमास्थित पृथ्वी युवा संगठनको आयोजनामा आगामी कार्तिक १६ गतेदेखि उक्त वडाको बोपुङ खेलमैदानमा प्रतियोगता सञ्चालन गरिने भएको हो ।

टिटी नकआउटको आधारमा खेलाईने उक्त प्रतियोगिताको पुरुषतर्फ बिजेताले नगद ५५ हजार ५५ रुपैंयाको साथमा मेडल र प्रमाणपत्र प्राप्त गर्ने आयोजकले जनाएको छ । उप-बिजेता टिमले नगद ३३ हजार ३३ रुपैंयाको साथमा मेडल र प्रमाणपत्र तथा तेश्रो हुने टिमले २२ हजार २२ रुपैंयाको साथमा मेडल र प्रमाणपत्र प्राप्त गर्ने आयोजक संस्थाका सचिव नविन श्रेष्ठले जानकारी दिनुभयो ।

त्यस्तै प्रतियोगिताको महिलातर्फ बिजेताले दश हजार नगद सहित मेडल र प्रमाणपत्र प्राप्त गर्नेछन् भने उप-बिजेता टिमले नगद सात हजार रुपैंया सहित मेडल र प्रमाणपत्र तथा तेश्रो हुने टिमले नगद पाँच हजार रुपैंयाको साथमा मेडल र प्रमाणपत्र प्राप्त गर्नेछन् । प्रतियोगितामा भाग लिनका लागि आगामी कार्तिक १६ गते बिहान ११ बजेसम्म टिम दर्ता गरिसक्नुपर्ने आयोजकले जनाएको छ । खेल सँग सम्बन्धित विस्तृत जानकारी तलको सूचनामा हेर्नुहोला ।