जेठ ५, २०८१ शनिबार
साकेला अनलाइन
२०८० चैत्र २८, बुधबार
साकेला- साकेला गाउँपालिकामा अपाङ्गता रोकथाम तथा पुनस्थापना कार्यक्रम सम्बन्धि अभिमुखिकरण कार्यक्रम सञ्चालन गरिएको छ । गाउँपालिका अध्यक्ष रविप्रकाश राईको प्रमुख आथित्यता तथा उपाध्यक्ष बिर्सिका राईको सभापतित्वमा अभिमुखिकरण कार्यक्रम सञ्चालन गरिएको हो । अपाङ्गता रोकथाम तथा पुर्नस्थापना कार्यक्रम संचालनका लागि अपाङ्गताको क्षेत्रमा काम गर्दै आएको संस्था करुणा फाउण्डेसन र साकेला गाउँपालिकाले निवर्वाचित जनप्रतिनिधि, कर्मचारी, शिक्षक, स्वास्थ्यकर्मी तथा वडा सचिवहरुलाई भेला गराएर अभिमुखिकरण गराएको हो ।
सो कार्यक्रममा प्रमुख अतिथिको रुपमा बोल्नुहुँदै साकेला गाउँपालिका अध्यक्ष रवि प्रकाश राईले सुसंस्कृत, संस्थागत र समृद्ध पालिका निर्माण गर्नका लागि हामी सबै क्षेत्रमा उत्कृष्ठ हुनुपर्ने धारणा व्यक्त गर्नुभयो । गाउँपालिकालाई समृद्ध बनाई देशभरीकै स्थानीय तहहरुमध्ये साकेला गाउँपालिकालाई उत्कृष्ठ र नमूना गाउँपालिका बनाउने अभियानमा लागिरहेको बताउँदै उहाँले बनेका मार्गचित्रलाई कार्यान्वयन गर्न सके देशकै उत्कृष्ठ गाउँपालिका बन्ने धारणा व्यक्त गर्नुभयो ।
प्रयत्न र कोशिस गर्दा सम्भव नहुने केही नभएको बताउँदै उहाँले हामी निर्वाचन भएर आएपश्चात कार्यालय परिवेश र कर्मचारीवर्गमा थुप्रै परिवर्तन गर्न सफल भएको बताउनुभयो । सिङ्गो देश, सात प्रदेश र ७५३ वटा स्थानीय तहहरुले नदेखेको सपना हामीले देख्यौं र योजना बनायौं अध्यक्ष राईले थप्नुभयो- उक्त योजनालाई कार्यान्वयन गर्नका लागि नीति र विधि बनाएर काम गरिरहेका छौं त्यसका लागि सबै राजनीतिककर्मी, विषयविज्ञ व्यक्तिहरु, नागरिक समाज, स्थानीयवासी लाग्न जरुरी छ ।
उहाँले पालिकाले आयोजना गरेको अध्यक्ष र उपाध्यक्ष सरिक हुने हरेक कार्यक्रममा विषयगत कर्मचारी र जनप्रतिनिधिहरु संवेदनशिल बनेर सहभागि हुन आग्रह गर्नुभयो ।
साकेला गाउँपालिकामा यस चालु आर्थिक वर्षदेखि साकेला गाउँपालिका, प्रदेश सरकार र करुणा फाउन्डेसन नेपालको ३३%, ३३% लागत साझेदारीमा अपाङ्गता रोकथाम तथा पुनस्थापना सम्बन्धी कार्यक्रम सञ्चालनमा रहेको छ ।
यस कार्यक्रमले जन्मजात हुने अपांगता न्युनीकरण, जन्म पश्चात् विकसित हुने अपाङ्गतामा रोकथाम र अपाङ्गता भएका ब्यक्तिको पुनः स्थापना लगायतका कार्यक्रम सञ्चालन गरिरहेको छ भने अपाङ्गता भएका तथा अपाङ्गता भएका व्यक्तिको परिवारको जीविकोपार्जन, पहुँचयुक्त भौतिक संरचना, संस्थागत सुदृढीकरणका, शिक्षा, स्वास्थ्य तथा सहायक सामग्रीको व्यवस्थापन तथा विभिन्न क्षमता विकासका साथै विविध तालिम समेत प्रदान गर्नेछ ।
३ वर्ष अवधिको सो कार्यक्रम २०८० माघ १ गतेबाट शुरु भएको हो भने आगामी २०८३ पुष मसान्तसम्म संचालन हुनेछ । यस कार्यक्रमको मुख्य उद्देश्य जन्मजात हुने अपाङ्गता र जन्म पछि हुने अपाङ्गता रोक्नु र अपाङ्गता भएका ब्याक्तिहरुको जीवनस्तर उकास्ने शिक्षा, स्वास्थ्यमा सहयोग गर्ने रहेको गाउँपालिका अध्यक्ष राईको भनाईछ ।
दश स्थानीय तह रहेको जिल्लामा चार हजार नौ सय २२ जना शारीरिकरूपमा अपाङ्गता भएका व्यक्ति रहेको जिल्ला अपाङ्ग सेवा सङ्घ खोटाङले जनाएको छ । राष्ट्रिय जनगणना-२०७८ अनुसार साकेला गाउँपालिकामा मात्रै २७१ जना अपाङ्गता भएका व्यक्तिहरु रहेका छन् भने १०४ जनाले पूर्ण र अति अशक्त अपाङ्गता सामाजिक सुरक्षा भत्ता प्राप्त गर्दै आएका छन् ।
साकेला अनलाईन प्रा.लि.द्धारा सञ्चालित डिजिटल न्यूज पोर्टल साकेला अनलाइन लोकतन्त्र र सम्बृद्दिको दिशामा स्वतन्त्र पत्रकारितामार्फत अगाडी बढि नै रहन्छ । हामी बिशेषगरी आर्थिक, सामाजिक, राजनितिक र साँस्कृतिक क्षेत्रका विकृति, विसंगति घटनाक्रमसँग नजिक रहेर आम जनतालाई सुसचित गर्ने प्रयास गर्छौ । समान दृष्टिकोण सन्तुलित बिचार हाम्रो मुख्य लक्ष्य हो । {More}
समराज राई
डिएम चाम्लिङ राई
१२३
प्रतिक्रिया